Ki jaka ba khring jingmut

Ka Nongbah Shillong

Ka Shillong ka dei ka nongbah jong ka jylla Meghalaya bad ka Head Quarter jong ka distrik East Khasi Hills. Ka Shillong kadei ka shnong rilum kaba itynnad bad ba paw bha, kaba don ia ki surok ba pyniasnoh bad ki ba bun ki Shnong shabar jylla. Ia ka kyrteng la ioh na u ‘Lei Shyllong, U lum ba lah ban iohi kyndiang na sor.  Ka kad liengsuin bad steshon rel ba jan tam ki don ha Guwahati. Ka jingdon jong ki skul, college bad university ba paw ha ka nongbah, kynthup ia ka Indian Institute Of Management(IIM) ka khring ia shibun ki khynnah pule ba nabar jylla sha ka nongbah.

Don Bosco Centre for Indigenous Cultures

Ka Don Bosco Centre for Indigenous Cultures (DBCIC) ka don ha Mawlai. Bun na ki nongwanjngoh kai pyrthei ki ju pynlut por ha kane ka centre ban tip bniah ia ka rukom im bad ka kolshor ba riewspah ki riewlum jong ka thain shatei lam mihngi ka ri India. Dei hangne ki don ki thup sah kynmaw da ki dur ba la shna pynwandur, ia baroh ki jait riewlum jong ki hynniew tylli ki jylla.

Ka DBCIC ka don Khadkhyndai tylli ki rynsan ba la buh ia ki dur bala ohshrong & airong pynitynnad kynthup ia ka Skywalk ba don ka tnum ka DBCIC. Ka dei ka wei na ki lympung wad jingstad na ka bynta kito ki khynnah pule/ research scholar ha ka lain Anthropology.

Lady Hydari Park

Kane ka park ka don ha pdeng sor. Ki phlang ba jyrngam, ki dieng bad ki syntiew ba pher bapher ki ai jing itynnad. Lait noh ha ka por tlang, lah ban ioh i ia ki syntiew bun jaid ha kane ka park. Ki khynnah ki lah ban ialehkai sohpadoi, shong syntuid, ia mareh ha kane ka park. Lah ban ioh i ia ki katto katne ki sim & ki mrad ha Lady Hydari Park.

Ka Nan Polok

Ia ka nan polok la shna ha ka por u Sir William Ward, u ba long u sahep Chief Commissioner jong ka sorkar Assam. Ki briew ki ju pynlut por ban iaid kai sawdong kane ka nan na ki jaka iaid kjat. Ki lieng rit bala buh khnang na ka bynta ki nong iad kai ki khring ia ki trai shnong bad ki ba nabar kumjuh. Ka dei ruh ka jaka kilan met jong kiba bun ha ka por mynstep.

Ka iingmane bah Cathedral ki riewngit Katholik

Ka iingmane bah jong ki Catholic ka don ha pdeng jong ka sor Shillong ha Laitumkhrah. Kane ka iingmane bah ki riewngeit katholik ka long kaba heh bad ba i tynnad. Ka jingpynwandur bad ohshrong da ki stad architekshor ba kyrpang, ka ia hap dur bad ki madan phlang bajyrngam sawdong.La ju tip ia kane ka iingmane kum ka Cathedral of Mary Help of Christians.

Ki iit bala shna pynitynnad kyrpang ba don sawdong ha iing mane ki khring ia kiba bun ki nongjngoh kai pyrthei. Hangne ka don ka jaka ba la tep ia U Bishop banyngkong jong ka Nongbah. Hapoh iing mane kidon ki dur ba la pynwandur janai, kiba batai ia ki jingjia katkum na ka kitab bakhuid.

Kapten Williamson Sangma State Museum

kane ka Musuem ka don ha ka kut jong ka State Central Library, hapoh ka jing peit jong ka Arts and Culture Department. Ki thup jingtip ba don hangne ki ai jingmyntoi ia bun Ki riew wad jingtip ia ka kolshor & rukom im ki riewlum tribal. Ki mot sah kynmaw ia ki riew ieit ri ba mynbarim la buh hangne kynthup ia ki mot jong u Netaji Subhash Chandra Bose & ka Smt. Indira Gandhi.

Golf Course

Ka jaka ialehkai Golf ka don ha madan Golf-link, kadei kawei na ki jaka ialehkai Golf barim tam ha ka ri India. Ka mariang ka la pynwandur hi kum ka jaka ialehkai Golf, khlem da donkam ban shna da ki mashin ne ki briew. Ki lyer pyngngad na ki diengkseh bad ki madan phlang ba jyrngam ki ai ia ka jingtngen bad jingjahthait ia ki nongwan kai. Ha ki por ba mynshwa ka don 9 (khyndai) tylli ki jaka thep bol Golf, katba mynta ka don baroh 18 (khadphra) ki jaka thep bol Golf. Ka dei kajaka pyngngad kaba ki Ki riew kilan met kiju smat ban wan dangstep phyrngab.

Elephant Falls

Ka Elephant falls ka don hajan hynniew mer kumba 12 kms na sor shillong. La pynlong ia kane ka kshaid da ka wah duid ba tuid na ki law kseh & mawsiang. Ka don sa kiwei ki kshaid ba marjan kiba itynnad ba la tip kum ka Wei Iaplam Falls bad ka Wir Phang Falls. La shna kyrpang da ki jaka iaid kjat ban poi sha kane ka jaka peitkai.

Shillong Peak

Ia u Lum Shillong lah ban iohi na sor bad u jngai tang kumba 10 km ei ei. Na kliar une u lum lah ban iohi ia ka jingiar jong ka sor Shillong bad ki jingtei ba don ha ka. Ki nongwan jngoh kai ki ju sngewtynnad ban ia bam khana sngewbha ha jrong lum.

Ia ka nguh ka dem, duwai phirat shisien shisnem la ju pynlong da ki Lyngdoh na ka hima Mylliem. Ha ka por janmiet ka jingthaba jong ki light ka ai ia ka dur ba itynnad jong ka sor. Ka dei ka jaka ba Ki Nongshondur ki ju sngewtynnad ban shon dur.